tijayaphutt_strotra

तिजयपहुत्त पयासय, अट्ठमहापाडिहेर-जुत्ताणं ।
समयक्खित्तठिआणं, सरेमि चक्कं जिणिंदाणं ।।१।।

पणवीसा य असिया, पनरस पन्नास जिणवर-समुहो ।
नासेउ सयल दुरिअं, भविआणं भत्ति-जुत्ताणं ।।२।।

वीसा पणयाला विय, तीसा पन्नत्तरी जिणवरिंदा ।
गह-भूअ रक्ख-साइणि, घोरुवसग्गं पणासंतु ।।३।।

सत्तरि पणतीसा विय, सट्ठी पंचेव जिणगणो एसो ।
वाहि-जल-जलण-हरि-करि, चोरारि-महाभयं हरउ ।।४।।

पणपन्ना य दसेव य, पन्नट्ठी तहय चेव चालीसा ।
रक्खंतु मे सरीरं, देवासुर-पणमिआ सिद्धा ।।५।।

ॐ हरहुंहः सरसुंस, हरहुंहः तहय चेव सरसुंसः ।
आलिहिय नाम-गब्भं, चक्कं किर सव्वओभद्दं ।।६।।

ॐ रोहिणी पन्नति, वज्जसिंखला तह य वज्जअंकुसिया।
चक्केसरी नरदत्ता, काली महाकाली तह गोरी ।।७।।

गंधारी महज्जाला, माणवी वइरुट्ट तह य अच्छुत्ता ।
माणसि महमाणसिया, विज्जादेविओ रक्खंतु ।।८।।

पंचदस-कम्मभूमिसु, उप्पनं सत्तरि जिणाण सयं ।
विविह-रयणाइ-वन्नो, वसोहिअं हरउ दुरिआइं ।।९।।

चउतीस-अइसय-जुआ, अट्ठ-महापाडिहेर-कयसोहा ।
तित्थयरा गयमोहा, झाएअव्वा पयत्तेणं ।।१०।।

ॐ वरकणय संखविद्दुम, मरगयघण-सन्निहं विगय मोहं ।
सत्तरिसयं जिणाणं, सव्वामर-पूइअं वंदे स्वाहा ।।११।।

ॐ भवणवइ-वाणवंतर, जोइसवासि विमाणवासीअ ।
जे केवि दुट्ठ देवा, ते सव्वे उवसमंतु मम स्वाहा ।।१२।।

चंदण-कप्पूरेणं, फलए लिहिऊण खालिअं पीअं ।
एगंतराइ-गह भूअ, साइणि-मुग्गं पणासेइ ।।१३।।

इअ सत्तरिसयं जंतं, सम्मं मंतं दुवारि पडिलिहिअं ।
दुरिआरिविजयवंतं, निब्भंतं निच्च-मच्चेह ।।१४।।